„25 години затвор за кражба на осум милијарди долари од клиенти на сега банкротираната берза за криптовалути ‘FTX’“ – пресуди американскиот суд во Менхетн во случајот со Сем Бенкмен-Фрид кој се смета за една од најголемите финансиски измами во историјата на САД.
Според судијата Каплан, 32-годишникот се однесувал како „пресметлив математички гениј кој барал моќ и влијание додека свесно правел погрешни постапки“. Иако Бенкмен-Фрид се извинил за колапсот на берзата и серијата лоши одлуки, во неговото однесување не било демонстрирано каење за постапките. Освен затворската казна на Бенкмен-Фрид ќе му биде одземен и имот од 11 милијарди долари.
Инаку, таканаречениот „Крал на крипто-валутите“ беше уапсен во декември 2022 година на Бахамите по налог на американското обвинителство откако неговата фрима банкротираше. Обвинителите го товареа Бенкмен-Фрид дека ги лажел инвеститорите и заемодавачите, како и дека украл милијарди долари од берзата за крипто-валути, што предизвикало да се забрза нејзиниот колапс. Обвинението се однесуваше за седум точки за измама и перење пари.
