За одлуката гласаа 171 пратеник, од кои 131 беа „за“, 29 беа „против“, додека 11 беа воздржани. Ниту еден од амандманите предложени од Србија не беше усвоен.
Мнозинството пратеници на Парламентарното собрание на Советот на Европа на пленарната седница во Стразбур на 16 април го поддржа членството на Косово во оваа организација посветена на човековите права и развојот на демократијата.
Сега останува на министрите за надворешни работи на Советот на Европа да одлучат дали ќе го прифатат Косово како најнова членка на организацијата или не.
Следниот состанок на Советот на министри ќе се одржи во средината на мај. Советот на министри за надворешни работи на Советот на Европа се состанува еднаш годишно, традиционално во мај.
Сепак, во дипломатските кругови се шпекулира дека членството на Косово можеби нема да биде на дневен ред на министерскиот состанок во мај.
