Генералното собрание на ОН денеска во 17 часот ќе гласа за резолуцијата за геноцид во Сребреница промовирана од Босна и Херцеговина, Руанда и Германија.
Српскиот претседател Александар Вучиќ пристигна во Њујорк за да се обрати на Генералното собрание. Во вторникот тој се состана со рускиот постојан претставник во ОН Василиј Небензја. За време на неговата посета, српскиот лидер изјави за новинарите дека резолуцијата е иницирана за да се покаже неизбежноста од политичко казнување за сите земји со независна позиција на меѓународната сцена. Тој вети дека ќе даде сѐ од себе за да го спречи усвојувањето на документот. Небензја, пак, рече дека иако резолуцијата може да биде усвоена, тоа ќе биде „пирова победа за нејзините спонзори“.
Документот го поддржуваат повеќе земји, меѓу кои Австрија, Албанија, Белгија, Обединетото Кралство, Данска, Ирска, Италија, Литванија, Лихтенштајн, Луксембург, Холандија, Полска, Словенија, Македонија, Франција, Хрватска , Финска, Естонија и Шведска, Бангладеш, Вануату, Јордан, Канада, Малезија, Нов Зеланд и Чиле.
Поддржувачите на резолуцијата веруваат дека во документот се користат зборови и изрази кои се во голема мера слични со другите резолуции на ОН за ова прашање и ја осудува трагедијата воопшто. Нејзините противници тврдат дека резолуцијата може да ја дестабилизира ситуацијата во регионот и нема никаква врска со сеќавањето на жртвите.
Предложената резолуција има за цел да го прогласи 11 јули за Меѓународен ден на сеќавање на геноцидот во Сребреница. Таа го осудува „секое негирање на геноцидот во Сребреница“ и дејствијата што ги величат осудените за воени злосторства, злосторства против човештвото и геноцид од страна на меѓународните судови, вклучително и одговорните за масакрот во Сребреница. Исто така, повикува на понатамошно гонење на одговорните и ја нагласува важноста од пребарување и идентификување на други можни жртви. Тој бара од генералниот секретар на ОН да воспостави програма за информирање за ова прашање и да започне со нејзино спроведување во пресрет на 30-годишнината во 2025 година.
