„САКАМ МОЕТО ДЕТЕ ДА ИГРА КАКО ДРУГИТЕ ДЕЦА, НЕ САКАМ ДА БИДЕ ВРЗАН ЗА КРЕВЕТОТ“
10 деца со хемофилија ризикуваат да останат без лекот што го земаат 12 години по ред. Еден од нив е Матеј, 12 години. Неговата мајка Соња Димовска вели дека разговарале со Министерот за Здравство Фатмир Меџити, но досега немаат никаков одговор.
СОЊА ДИМОВСКА, РОДИТЕЛ
“Бараме да продолжиме да ја земаме терапијата што ја примаме 12 години, за да не ни се промени молекулата, како што докторката го покажа документот на средбата со министерот, според прегледот, бидејќи со промена на лекот може да се создадат инхибитори.“
Министерот за Здравство вели дека терапија за болните од хемофилија има, но експертите ќе одлучат кои лекови ќе ги добијат.
ФАТМИР МЕЏИТИ, МИНИСТЕР ЗА ЗДРАВСТВО
“Во овој поглед немаме никаков проблем. Има терапија. Пациентите се покриени. Не знам зошто е отворена оваа тема. Ако некој мисли дека ќе дадеме одреден лек затоа што некој така сака да одлучи, мојот став е многу јасен. Апсолутно немам намера да се мешам или да вршам притисок врз лекарите и професионалците и експертите од областа на здравството. Отсега и еднаш засекогаш ние како народ и како држава мора да научиме дека во здравството мора да го почитуваме мислењето на експертите.“
Соња вели дека на средбата докторката со факти сведочела дека на овие деца им е потребен овој фактор на коагулација.
СОЊА ДИМОВСКА, РОДИТЕЛ
„Ние не бараме самоиницијативно, но ова не е лекарски совет. Докторката го лекува мојот син веќе 14 години. Деноноќно е во контакт со нас и знае каква терапија му треба. Се е засновано на факти и документи.“
Таа не сака нејзиното дете да заврши врзан за креветот.
СОЊА ДИМОВСКА, РОДИТЕЛ
“Познавам деца кои се на инхибитори, некои се преселиле од нашата земја затоа што кај нас нема доволно лекови за овие пациенти, а други се врзани за креветот.“
Досега со терапија нејзиниот 13-годишен син функционира како и другите деца.
СОЊА ДИМОВСКА, РОДИТЕЛ
“Никој не ги прашува пациентот и нас родителите како живееме. Во моментов се чувствува нормално, нема недостаток. На училиште функционира нормално. Зошто да му го одземат тоа?…
