Косовската министерка за надворешни работи, Доника Гервала Шварц тврди дека предлогот на Европската унија (ЕУ) за формирање Заедница на општини со српско мнозинство нема да биде прифатен ако Србија не ги исполни обврските преземени со потпишување на Бриселскиот договор.
„Не го спроведуваме тој план, кој е дел од бриселскиот процес, без Србија да се обврзе да го спроведе својот дел од работата. Затоа треба да ги раздвоиме работите, или ќе се занимаваме со ЗСО во Брисел или ќе се занимаваме со тоа во Косово, но не можеме да ги поврземе тие два процеса“, изјави Гервала во интервју за албанскиот Глас на Америка на 24 мај.
Таа додаде дека владата во Приштина минатата есен доставила коментари за предлогот на ЕУ за формирање на Заедницата, но до денес не добила одговор.
Непреземањето конкретни мерки за формирање на Заедницата го оневозможи Косово да стане членка на Советот на Европа (СЕ). Прашањето за таа заедница го остави Косово надвор од агендата на Комитетот на министри на Советот на Европа на 17 мај, кога требаше да се одлучува за членството на земјата во оваа организација.
Условот на некои нејзини земји-членки, вклучително и Франција и Германија, беше Косово да поднесе барем предлог статут за оваа заедница до Уставниот суд на евалуација.
Гервала ги опиша како „политички, неправедни и неразумни“ барањата на некои земји од ЕУ, Приштина да преземе конкретни чекори кон создавање Заедница на општини со српско мнозинство за да ја постигне својата цел – членство во Советот на Европа.
„Во Брисел се обврзавме на два договора – оној од февруари минатата година и договорот за редослед и спроведување на овој договор во март и затоа нацртот што ни го достави пратеникот Мирослав Лајчак за Заедницата на општините може само да биде дел од пакетот на овие два договори“, вели Гервала и додава дека одвојувањето на Заедницата од тој пакет „нема никаква смисла“.
Гервала рече и дека патот кон ЈИ, ЕУ и НАТО нема алтернатива.
