Захариева: „Промената на Уставот на Македонија не е ништо страшно“

Поранешната шефица на бугарската дипломатија и актуелен пратеник во тамошниот парламент од редовите на ГЕРБ во изјава за БГНЕС вели дека и Софија, и Скопје губат од лошите односи и оти е корисно дветe земји да отворат нова страница
Повод за нејзиниот коментар, како што наведува агенцијата, е претстојното гласање во македонскиот парламент за вметнување на Бугарите во Уставот
С Македонија мора да ги спроведе потребните реформи и да ги исполни условите доколу сака да започне преговори за влез во Европската Унија (ЕУ).

Ова во изјава за бугарската новинска агенција БГНЕС го вели заменик-претседателката на ГЕРБ Екатерина Захариева, која е заменик-претседател на комисијата за надворешна политика на бугарскиот парламент и поранешен министер за надворешни работи на источниот сосед, во периодот од 2017 до 2021 година.

Повод за нејзиниот коментар, како што наведува агенцијата, е претстојното гласање во македонскиот парламент за вметнување на Бугарите во Уставот. Ова, се додава во веста, е едно од главните барања утврдени во т.н. „Француски предлог“ што властите во Скопје се согласија да го спроведат пред одржување на втората Меѓувладина конференција меѓу С Македонија и ЕУ, или, како што пишува БГНЕС, пред да започнат „вистинските преговори за членство на земјава во Унијата“.

Според Захариева измените на македонскиот устав не се голема работа и ги повикува „македонските соседи и пријатели да не се плашат од промените“.

„Измена на Уставот на РСМ не е голема работа. Бугарите се дел од реалноста во РСМ и тоа мора да се прифати“, вели поранешната шефица на бугарската дипломатија и актуелна пратеничка во 49. Национално собрание на Бугарија.

Таа е категорична дека е корисно двете земји да отворат нова страница во односите.

„И Софија и Скопје губат од лошите односи. Многу е подобро да немаме граници меѓу нас и да се развива бизнисот. Важно е луѓето да можат слободно да се среќаваат и да комуницираат без страв“, вели Захариева.

За сето ова да се случи, додава таа, С Македонија мора да ги исполни условите од Прегопварачката рамка и да прифати дека Бугарите се дел од РСМ.
„Мора да се прекине со дискриминацијата врз Бугарите, како и неодамна зачестените случаи на физичко и вербално насилство. И сето тоа е добро за РСМ и за граѓаните на оваа држава, тие самите да се чувствуваат добро во својата татковина, а не да се иселуваат“, вели Екатерина Захариева.

Пленарната седница на Собранието на С Македонија е закажана за 18 август и на неа треба да почне расправата за амандманите за уставните измени. Измените, со кои Бугарите треба да влезат во Преамбулата на Уставот, се услов за одржување на Втората меѓувладина конференција меѓу С Македонија и Европската Унија, во рамките на преговорите за членство во Унијата, што земјава ги почна лани во јули.
За потребата од донесување на уставните измени, како еден од првите чекори за отворање на Уставот, потребно е двотретинско мнозинство, односно гласовите на 80 пратеници, кои владејачкото мнозинство засега ги нема, а опозициската ВМРО-ДПМНЕ и понатаму цврство останува на ставот дека нема да поддржи „уставни измени под бугарски диктат“.

Предлог-иницијативата на Владата за измени на уставот на 25 јули го помина првиот собраниски филтер. Комисијата за уставни прашања тогаш со 10 гласа „за“ и седум „против“ беше изгласан предлогот за пристапување кон измена на Уставот. Иако, расправата во Комисијата беше предвидено да трае 10 дена, таа заврши за околу два часа, откако членовите на комисиското тело од ВМРО-ДПМНЕ и Левица се повлекоа од понатамошна дискусија.

Со предлог-иницијативата што ја усвои Владата и ја достави до Собранието, се предлага бугарскиот и уште пет други народи да се додадат во Преамбулата од Уставот – хрватскиот, црногорскиот, словенечкиот, еврејскиот и египќанскиот народ.

Покрај ова, предвидена е уште една уставна измена во однос на составот на Комитетот за односи меѓу заедниците со која се предвидува да се измени бројот на членовите и наместо досегашните 19 члена, бројот да се зголеми на 43 члена, при што 16 члена од редот на пратениците во Собранието – Македонци и Албанци, и по еден член од редот на пратениците Турци, Власи, Роми, Срби, Бошњаци, Бугари, Хрвати, Црногорци, Словенци, Евреи и Египќани.

Поврзани објави

Цврста поддршка на Украина по неоправданата руска агресија- телефонски разговор на Силјановска со Зеленски

Од кабинетот на Претседателката Гордана Сиљановска Давковa соопштија дека таа денеска остварила телефонски разговор со претседателот на Украина,…
Повеќе

Силјановска Давкова: Нека подвигот на светите браќа бидe наш патоказ и морална и духовна вертикала за достоинствено

Претседателката Гордана Силјановска Давкова упати честитка до граѓаните по повод големиот празник, 24 Мај, Денот на сесловенските просветители…
Повеќе
Total
0
Share