Холандија и Србија забележаа важни гостински победи во квалификациските мечеви за Европското првенство во 2024 година, додека Албанија ја совлада и Полска за да се зацврсти на првото место во својата група Е.

Холанѓаните по катастрофалниот старт на квалификациите со 4:0 пораз од Франција, се враќаат со три побеи во низа, триумфирајќи на гостувањето во Даблин кај Република Ирска со 2:1. Домаќините дојдоа до експресно водство со гол од пенал уште во петтата минута преку Алан Ајда, но „лалињата“ во 19. минута израмнија исто така со гол од белата точка на Коди Гакпо. Трите поени за тимот на Роналд Куман ги обезбеди Вут Вегхорст во 56. минута.

Србите, пак, по домашниот пораз од Унгарија во претходното коло, стигна до 3:1 победа на гостувањето кај Литванија благодарение на хет-трикот на Александар Митровиќ (21., 32. и 43. минута).

Албанија продолжува да е едно од најпријатните изненадувања во овој квалификациски циклус, совладувајќи ја Полска со 2:0 за прво место на табелата и зголемување на притисокот на полскиот селектор, Фернандо Сантош. Несудениот македонски репрезентативец, скопјанецот Јасир Асани ги донесе домаќините во водство во 37. минута со апсолутно прекрасен гол, за Мирлинд Даку во 62. минута да го запечати триумфот.